Sýǵa shomylý maýsymy ashylǵannan-aq qutqarýshylardyń jumysy qarbalasyp ketedi. Olar jyl basynan beri oblys aýmaǵyndaǵy sý aıdyndaryna 201 reıd jasap, 20 myńnan astam turǵynǵa sýdaǵy qaýipsizdik erejeleri túsindirip, únparaqtar taratqan.
Qaýipsizdikti kúsheıtýge tótenshe jaǵdaılar departamenti yqpalymen qurylǵan «Jas qutqarýshy» klýby da kómek berip otyr.
«Jasyratyny joq, qaýipsizdikti elemeıtinder áli de kóp. Sonyń saldarynan jyl basynan 3 adam sýǵa ketti. ÁQBtK-niń 412-baby boıynsha 5 adamǵa hattama toltyrylyp, aıyppul salyndy. Qazir profılaktıkalyq jumystarǵa 225 eriktini jumyldyryp otyrmyz», deıdi TJD Azamattyq qorǵanys basqarmasy basshysynyń mindetin atqarýshy Ǵafýr Aqmyrzaev.
Onlaın rejımde oblystyń 31 548 oqýshysyna «Sýdaǵy qaýipsizdik erejeleri» taqyryby boıynsha ınteraktıvtik sabaqtar ótkizilipti. Bıylǵy oqý jylynda oblysta 187 «Jas qutqarýshy» úıirmesi qurylyp. olarǵa 1753 bala qatysypty.
Jýyrda osy klýbtar arasynda oblystyq saıys ótedi. Úzdik shyqqan komanda Kókshetaý qalasynda ótetin negizgi saıysqa joldama alady.